ByeBye Suedinsle-Kia Ora Nordinsle

Kia Ora Mitenand

so mer send jetzt of de nordinsle acho, also das heisst Windy Wellington het ois am drette grad so rechtig begruesst met me hammer Unwetter i de Nacht.
Zom glöck hend mer es Cabin gha, obwohl halt d'Fenster doch ned sooo ganz dicht gsi send :-)

So was esch denn passiert sed em letschte Brecht, i glaub de esch om Wiehnacht ome gsi.

Abel Tasman
Jep i be met de Sarah 4 Taeg im Abel Tasman gsi. En Wunderschöni wanderig met vel. Vel Gepäck. Sooo vel verschedeni grüen hani glaub no nie binenand gseh. Ond die Farn send eifach fantastisch. Ah jo ond oise Chocher... i denke e paar werde bez muese schmunzle, aber esch die belligsti variante gsi foer so vier taeg. leider ken benzinchocher...
Was ois aber fasch de ganz Trip versaut het send die Mistdinger namens Sandflüüge gsi. Jo es send vel gstorbe, jedoch meistens nachdem si üs scho gnoh hend. Iidrücklich esch Awaroa Inlet gsi. Bi Ebbe cha mer of sand laufe, bi Fluet esch en riisige See z'gseh, unvorstellbar wenn me ned beides gseh het.

Farewel Spit/Wahakiri Beach
eine vo mine Top10 Täg of de Reis bes jetzt. Ganz am linke Spitz obe vo de Südinsle. Unglaublich schön und velfältig de Strand! Emmer wenn me wiiterlauft fend me weder es neus Loch im Stei... ond ich han eifach nor no choene omegumpe wie me of de Foeteli gseht, so freud hani gha :-)
Dos soo gwendet het a dem Tag hend mer es gratis Sanspeeling derzue becho :-)
Wo d'Mela ond ich of em Farewell Spit, das esch en Wanderdüne, send go omelaufe, hend mer üs fasch verlaufe:-). So stell ichs mer öbbe ide Sahara vor.

Jo ond denn am nexte Tag semmer of Picton gfahre, hend in Nelson no chli Silverster ikauft ond hend denn s'füürwerk vo Picton bestuunt. Mer send 3 Täg do of em Camping gsi ond hend Krieg agfange met em Bsitzer...
In Picton beni no ein Tag go kayak fahre, Minin Biifahreri eschen New Yorkeri gsi, es het nor e chli gägewend gha.... ond ergendwie hani jetzt no s'gfühl dass i eigentli alles selber gmacht han....
Am Obe beni denn mini erste Grüenleppe Muschle go esse, sie hend nor glachet woni met mim Teller be go froge wie das denn jetzt genau got met em esse :-)

Öberfahrt of d'Nordinsle esch emmer nöcher grutscht und s'Wetter esch emmer schlechter worde, so dass mer zemli nix gseh hend vo dem wunderschöne Malborough Sound. Bye Bye Süedinsle.

Hi Nordinsle.
Ja wie ois das verschlofne Wellington begrüesst het hani jo scho gschrebe. Au am zwoite Tag eschs no verschlofe gsi, wel anschiinend en Public Holiday gsi esch, aber hauptsach ich han mis Ticket förs Muse konzert am 15. januar.

Bridge to Nowhere
Ja in Wanganui hend mer denn versuecht usezfende wie mer zo dere Brugg chont wos im 1936 boue hend, chorz drufabe esch aber leider en Erdrutsch gsi ond het die ganz Stross dert ane verschüttet. Do alli Buure au scho abgwanderet send het d'Regierig beschlosse, die Stross nömme z'erneuere. Fazit: Me fahrt jetzt 1 Stund dJetboot zo dere Brugg of em tolle Wanganui River, wo eim die ganz Ziit au Kayak begegned.

Am nexte Tag send mer bi schönstem Wetter of de MT. Ruhapehu, en Vulkan ue. Nach enere chorze, strenge Wanderig dur d'Äsche beni of ne tolle Usichtspunkt cho. Wie im Herr der Ringe fühlt me sech det obe :-)
Tolli secht of de Mt. Taranaki ganz im Weste im Wolkemeer und natürli de MT NGH... wie au emmer de Kegelvulkan. Wunderschön.

Ok ich versuech mol das wunderschön weg zloh ab jetzt. Wiiter semmer denn rechtig Taupo, wo mer de Mela ere Weltreise Cousin no troffe hend. Esch en Lustige obe wurde met em und sine Südtiroler Cumpane.

Taupo und Rotorua
jo es duet do überall echli Räuchle wördi sege und de Bode esch eim ned emmes soo ghür zum drufstoh. Hend diversi so Rauch und Geysir parks bsuecht. Send ame fasch echli unheimlich. Jo ond natürli hend mer bim Touriste schauspil Lady Nox au müsse metmache. Abartig de Ameisihuufe am 10:15 bi dem Geysir. Jo met echli Seife chan me halt sogar en Geysir time.

Morn mache mer üs uf in Weste, denn in Oste, denn Coromandel, denn Konzert, denn Norde jo ond denn gönd Tschi Wai Tschi Ei EX scho weder hei :-(
(Gygax of englisch hani jetzt scho soo mängisch ghört :-)

Liebi Grüess Conny