Pinguin Island, Blue Mountains und Sydney

Hallo Zäme

So ich chan jetzt weder in Schwiizerdütsch schriibe, wel d'Mela het en Laptop debi ond juhui de het ganz vel ööööööööö ääääääää üüüüü haha

also morn gots ab of New Zealand. was i ide zwüscheziit erläbt han, do en chliini zämefassig...

Pinguin Island
Am Sonntig morge früeh beni met de Desi of Fremantle gfhare ond det hani d'Sandra ond d'Simona troffe. Zäme semmer den of Rockingham gfahre.
Det acho hämmer scho es paar Lüt gseh dors Wasser of d'insle öbere laufe. send öbbe 500m womer bi guetem Wetter chan of d'Insle öbere laufe. esch es mega Erläbnis gsi.
Of de insle händ mer denn nach chorzem sueche ide Höhlene au es paar Pinguin gse. s'Jööhh het fasch nömm wele ufhöre, aber si send wörkli Süess

Am Mentig hani denn nomol en chochtag igleit ond han Chnöpfli ond Filet im Teig usprobiert. jäno d'Knöpfli händ denn halt so usgseh wie die ame vom dani, aber fein sends trotzdem gsi :-)
de Teig vom Filet esch chli hert gsi, aber Aussies hends emel gern gha.

Blue Mountains
Jo ond am Zistig morge beni denn quer dors Land (4Stund) vom Weste in Oste gfahre. d'Mela, Sämi ond Lian händ scho gwartet, ich ben ergendwie dor es schliichwägli usecho wel anere Kontrolle beni nie verbi cho.
Mer händ denn de Wäg, imene vollbeladnige Auto, us Sydney use gfunde ond send rechtig Blue Mountains gfahre.
Emene schöne B&B händ mer öbernachtet, es esch Sauchalt gsi det ond mer händ sogar müsse d'heizig aloh.
Am nexte Tag hend mer denn de wäg zo de 3 Sisters gno, met em Lian ide Ruggetragi. es send es paar Stufe gsi bes mer denn ganz onde acho send, zum glück eschs ufe met me Bändli gange. Megasteil, so dass mer im Bändli händ müse legge.

Sydney
Oises Gepäck, Mer ond s'öberladne Auto esch also bem Apollo in Sydney acho. Nach langer Warteziit esch mol es taxi cho, de Fahrer het aber gfunde, das er oises Gepäck ned is Auto bringt :-) s'MAXI TAXi het müse cho...

In Sydney hend mer denn oises B&B in the Rocks bezoge. Das esch grad nebem riise Shangri La hotel... das esch chli en anderi priisklass. :-) Die Onderkonft esch wie mer gmerkt händ suuper gläge, foif Minute vo de Harbour Bridge, chorze wäg zo de Fähri ond zom Opere Huus.
Was ned heisst dass mer i dene Täg do in Sydney kei Kilometer gmacht händ.... uuh oisi Füess

Jojo am erste obe han mi grad mol of die 134m hochi Brugg ue gwogt, esch hammer gsi met em Vollmond. am Zwoite Tag hend mer gmüetlich wele de Botanischi Garte erkunde, mer händ denn oise optimali Platz gfunde zom Föteli mache wo Opere Huus ond Harbour Bridge zäme droffe send. Han au schnell gmerkt dass d'Mela es bezeli meh Föteli macht wie ich ond de Öbername Miss Klick vo erer Muetter gerbt het :-)

Am Samstig semmer in Zoo. de esch jo suuper do. Me fahrt met de Fähri öbere ond fahrt denn met de Luftseilbahn ufe an oberste Punkt vom Zoo, so het mer vel Tierli scho mol gse ond chan nacher am Hoger weder abe laufe ond met de Seilbahn weder ufe. Hammer esch dert d'Vogelshow gsi, wo mer au no grad en Usbleck of d'Stadt gha het. Zobe semmer go fotene mache a oise Fotopoint. ond haha mer hend dert Schwiizer troffe wo de Mela grad no eri Kamera erklärt hend...

Am Sonntig hemmer Grittibänz und Zopf bache wie sechs ghört för en Samichlaus. I han vo de Mela glehrt was en 2er, 4er, 5er, 6er ond sogar 8er Zopf esch. ehrlich gseit brengi ned mol ide Schwiiz sooo hammer Zöpf ane :-)

Am Menti hend mer en gmüetliche Tag in Manly (en Teil vo Sydney) wele mache. d'Conny het den weder mol en Wäg gfunde wo chli länger gange esch, ond so esch si ide FlipFlop 4,5 Stund öber Stock ond Stei, während die andere gmüetlich de Strand gnosse hend. Tja be mer vorcho wie d'Japaner ame in Lungere i de Turnschüeli of em Iis.
D'Mela het zom Glöck no kei vermessmäldig doregeh besi weder zrugg cho ben.

So demfall wördi säge:

CU Australia............. Hi New Zealand