New Zealand, oder echli Schwiiz am andere Endi

Sodeli ich meld mech au weder emol. Mer send vor 10 Tag in Christchurch acho ond händ natürlich scho weder mega vel erläbt.

Christchurch

es esch extrem gsi do i dem Städtli azcho :-), es esch sochli englisch, oder emel so wie ich mer England vorstelle met me Flössli derdor, ohni Hochhüser ond gmüetlich. Spötistens jetzt merkt wohl jede dasi no nie en England gsi ben .-)

Was extrem gsi esch, esch die Ruhe! Nach Sydney esch es do eifach ruhig gsi, ond ab ond zue esch es Auto dore gfahre, fascht wie z'Gallecherch :-)

Z'nacht hemmer zwoimol bi me u feine Mexikaner gässe.

Am erste Tag semmer chli ide Stadt gsi ond im Botanische Garte chli go usspanne. Ein Stond hani no of em Hauptplatz verbrocht, wos en Markt gha het ond ganz vel Strassemusikante und steppendi Chind, ned vergässe dörf me natürli de berüemti Schreier, wo au sini Meinig kund do het. Wahrschinlich verzellt er jede Tag das me Neuseeland z'oberst of d'Weltcharte sett tue, wahrschiinli wels so vel Schof hend.

Kaikoura

Jo mer send weder mobil met em Auto ond em Zelt onderwägs, bes jetzt händ mer zwar öbbedie ned im Zält gschlofe, wel is 10 Grad met em Lian de doch chli z'chalt send.

Schnell hend mer gmerkt, dass 100 KM in Neuseeland ned s'gliche esch wie in Australie ond das mer oisi Route velech chli müend apasse. Am 11te am Morge send de Sämi ond ich of ne Whalewatch Tour. Leider hend mer kein Wal gseh, deför esch am Sämi nacher schlecht gsi. D'Mela esch denn spöter gange ond het die tolli Schwanzflosse met Berge chöne fötele, de Sämi ond ich hend deför s'Geld zrogg becho :-)

(Meh Geld zom Shoppe also)

Am Nomitag hani denn en Klippewalk entlang vo Kaikoura gmacht, me fühlt sech do schnell di hei, es het Berge ond Chüe, da wo chli komisch esch, esch dass mer s'Meer au no ofs gliche Foti brengt.

Am Obe semmer üs no ide warme Quelle vo Hanmer Springs go entspanne, das het am Lian au total guet pässlet :-)

Akaroa

Am nexte Tag semmer vel gfahre, z'erst of Christchuch go Chüssi hole vo de Mela und em Sämi (das esch oebrigens au da Hotel gsi wo d'Mela als ersts es WC Boersteli esch go hole ad Rezeption ond nacher met me Putzchessel voll Zueg zrogg cho esch)

nacher semmer ofs Kurvige Akaroa, dert eschs sogar mer als Fahreri ame schlecht worde, nemmt mi ned wunder wies de andere gange esch wo hend müese metfahre... Am Obe semmer bes of Timaru cho, de Camping esch zemli voll gsi wel det en Liechtathletikalass gsi esch.

Queenstown

Onderwegs nach Queenstown semmer bim Lake Tekapo verbicho, det hets det hets definitiv e chele zom hürote, Leider esch a dem Tag de Blick of de Mount Cook ned so guet gsi, mer hoffe das mer en vo de Westküste us gsend.

In Quenstown hend mer 3 Sache gmacht, mer send of e Berg ue wos gschneit het, mer hend bezli Geld usgeh zom sache ichaufe,(hauptsächlich warmi) ond ich han 2 Mol gschroue wie am Spiess. Werom? Es het do so e cools Riitiseil gha woni onbedengt druf ha müese. Es esch es Pendel wo us 160m usegompsch ond de chorz e freie Fall hesch ond denn eifach nochli amene 120m lange Seili schauklisch.... eifach Hammer chani do dezue nor säge, ond wel s'zwoite mol nome 30Dollar kostet het beni grad no e zwoits mol gange..damol henderzi.

Milford Sound

Oisi nexti Station esch Milford Sound gsi. Nachdem ich Glüewürmli in Te Anau per Boot ha chöne bestuune semmer durs schönste Tal ever of oisere Reis gfahre, s'Ganze Tal het blüeht ond ide See händ sech d'Berge gspieglet. Bim lange Tunnel hend denn Keas of ois gwartet, am liebste hettes glaub Dichtige vom Auto gässe. Nach enere Nacht met Sandflüüge hend mer am Morge s'erste ond chlinste Boot usem Fjord gno (Danke Netti för de Tip), es esch eifach wunderschön gsi, es bezeli Neblig, Chüel ond sonnig, so wies sött si ond e gratis Duschi onder de Wasserfäll hend mer au no becho nachdem ois d'Seeleue guete Morge gseit händ.

Curio Bay

Am nächste Tag semmer lang im Auto gsässe, mer send de Scenic Route entlang bes of Curio Bay gfahre, das heisst so vel wie mer send as andere Endi vo de Welt gfahre....

es esch en Schöni Strecki gsi ond in Riverton hend mer z'Mittag ond Z'Nacht grad zäme gässe wels e soo en grossi Portion geh het. Die hend mer ois nach em Edelsteisammle am Gemstone Beach au verdient .-)

In Curio Bay händ mer denn es Backpacker Zimmer gnoh wels eifach weder mol Sauchalt gsi esch ond am Obe beni nochli go laufe, esch en schöne Strand det, wo Delfine grad vor de Nase ome gumpet. Am Obe hani denn no es paar Video treit vo ganz Fotogene Tierli.

Yellow Eyed Pinguins hets det wo am Obe us em Wasser chömed ond ere Wäg zo de Nescht sueche...schöne esch, dass me da do eifach so chan mache ohni dass e grossi Touristeatraktion esch wie in Omaru zum Bispel.

Die Tier send eifach de hammer ond s'einte Video erenneret mi chli a …. de Gregi ond Gina... dert i dem Summer wos umespekuliert händ wies es EI wörde usbrüete.....

A jo s'Wetter esch bes jetzt öbrigens zemli guet gsi, sozäge kei Räge ond jetzt au weder wärmer. Ond Ziitverschiebig esch eso, das ich 12 Stund vor oich im noie Johr werde sii, haha ich lüüt esch denn a wenns ned so cool esch däne, dass ehr im alte chönd bliibe

nach Dunedin

Jo me cha säge dass am 16te met dene Pinguin oisi Glücksträne agfange het, ond zwar eifach i dem Senn, dass mer emmer zur Richtige Ziit am richtige Ort send ond das per Zuefall.

Ok de 17ti het ned so toll agfange, wel nämli i dem Nescht Curio Bay s'Telifon ned funkrioniert het ond d'Mela ond ich doch diverse Lüt hend wele zom Geburi gratuliere.

Aber denn eschs los gange mit oisere Glückssträne...

Cathedral Caves. Das esch en Höhli am Meer wo de Igang usgseht wie en Kathedrale... ond si het 2 Wuche ned chöne uftue, esch aber a dem Tag för 2 Stund weder begehbar gsi vo 10 bes 12. ond haha mer send zuefällig am halbi Zäni dert gsi ond hend das Wunder der Natur chöne go aluege... es esch echli unheimlich gsi we mer dänkt, dass das ganze sösch zom teil met Wasser gföllt esch.

Die Scenic Route het ois denne wiiter zom ne Wasserfall, zom Jacks Blowhole ond zom Nugget Point brocht. Alles tolli Plätz. Am Obe semmer denn in Dunedin acho Hend en schlechte zeltplatz bezoge ond send am Obig of d'Otago Peninsula use gfahre.

Am össerte Punk vor Insle hend mer en spektakuläre Sonneondergang gfötelet, es het e paar Lüüt gha dert wo mer of oisere Strecki a dem Tag paar mol troffe händ, aber die wenigste hend sech för de Sonneondergang interessiert so wie mer. Ha denn mol met e paarne gschwätzt ond die hend is verzellt, dass do jetzt denn Blue Pinguins us em Wasser chömed.. :-) i ha jo scho gwösst dass die dert gsesch, aber ha dänkt me muen en Tour bueche. So hämmer denn die munzige Zwergpinguine bi Nacht beobachtet wies omerenned, au weder per zuefall.... Ich Nachtblends ha si zwar fasch ned gseh.

Tiaeri Train nach Middlemarch

Jo on höt esch de grossi Tag gsi, wo mer met em Zug vo Duniden of Middlemarch fahred, dert ane wo d'Fraue im März in Gummistefel fahred om sech eine vo dene tolle Buure us Middlemarch uszueche.... genau mis Ding also :-) nor leider im März.

Zugstrecki dert ane chan mer also wörkli enpfäle, sie füehrt dor nes wunderschöns Tal wo met Blueme öberwachse esch, ond wel de Zog nor met 25KM/H fahrt, chan mer sech au alles genau aluege.

Ansonsten gets nüt Spektakulärs in Middlemarch, aber natürli hend mer gliich die tolle Manne wele gseh... för ois hends ned en Strip anegleit wie ame im März, deför hends för ois d'Füürwehruniform agleit. HUHUU...

Ja Gschecht derzue esch eso, en Dame wo id Ferie het wele, esch i oise Zug iegfahre, de fahrt dert au nor 4x pro Wuche verbii d'Chance esch also chli dass en Zug chunt wen dröber fahrsch, ond so het si ond ere Ehema wo hendeno cho esch en riise Schock gha, zom Glöck esch nüt schlimmers passiert, s'Auto hets einisch rondome treit ond jetzt hets en Totalschade. Natürli het de Zug grad dert ghalte wo ises Zugabteil nebe dra gsi esch... Jo ergendwenn öbbe e viertel Stund spöter send denn die tolle Middlemarch Manne cho ond hend das Auto vom Zug weg glüpft, sii send wahrschiinli grad am Schoofschere gsi ond hend dorom sooo lang gha :-)

Siii send aber zemli tifig gsi met Wasserschluuch uspacke, obwohls ned brönnt het.

Jo das Abentüür het denn doch en Verspötig vo öbbe enere Stund ge ond in Middlemarch hends üs Ziit kürzt, aber susch hette mer jo nüüt zom verzelle.

Nach de Murmeli i bi Omarui saege mer Morn de Ostküste vor Süüdensle tschüss ond gönd entgültig in Weste. In Nelson treffe mer denn am Sämi sini Schwöster ond Cousine ond d'Sarah zom gmüetlich Wiehnachte fiire. Nacher gangi met de Sarah in Abel Tasman Park foif Täg go laufe.

Ich wünsch oich en schöne Advent, gnüüsed Guezli.... hoffe das mer s'Mami im Januar no paar Guezli metbrengt..... (Hoffe du lesisch da Mami)

CU

Conny.

.